දරු උපතකින් පසුව ලිංගිකව එකතු විය හැක්කෙ කවදා සිට ද?

දරුවෙකුගේ උපත කියන්නේ ජීවිතයේ ඉතාමත් සුවිශේෂී, සතුටුදායක අවස්ථාවක්. ඒත් ඒ සතුට සමඟම මව්වරුන්ටත්, පියවරුන්ටත් ශාරීරිකව, මානසිකව සහ සම්බන්ධතාමය වශයෙන් විශාල වෙනස්කම් වලට මුහුණ දීමට සිදුවෙනවා. දරුවා උපන් පසු ලිංගික ජීවිතය පිළිබඳව බොහෝ දෙනාට ඇත්තේ ලජ්ජාවෙන් හෝ බියෙන් කතා නොකරන ප්‍රශ්න ගොඩක්.

මෙය සාමාන්‍යයි. මේ ලිපියෙන් අපි උත්සාහ කරන්නේ ඒ සැඟවුණු ප්‍රශ්න ගැන විවෘතව, සරලව සහ විශ්වාසය ඇතිව කතා කරන්නයි.

දරුවා උපන් පසු කාලය හා ඇති වන වෙනස්කම්

දරුවා උපන් පසු කාලය (postpartum period) කියන්නේ මවගේ ශරීරය නැවත සාමාන්‍ය තත්ත්වයට හැරෙන අවධිය. මේ කාලයේදී

ගර්භාශය පෙර ප්‍රමාණයට හැකිලීම
පටල, මැහුම් සහ තුවාල සුවවීම
හෝර්මෝන මට්ටම් වෙනස් වීම
නව ජීවිතයක වගකීම් හමුවේ මානසික පීඩනය

වගේ දේවල් එකවර සිදු වෙනවා. මේ සියල්ලම ලිංගික ජීවිතයට සෘජුවම බලපාන කරුණු.

නැවත ලිංගික සම්බන්ධතාවය ආරම්භ කළ යුත්තේ කවදාද?

බොහෝ විට වෛද්‍යවරුන් උපදෙස් දෙන්නේ දරුවා උපන් පසු සති 6ක් පමණ ගත වූ පසු ලිංගික සම්බන්ධතාවය ආරම්භ කරන්න පුළුවන් කියලා.

නමුත් මෙය “එදිනම කරන්න ඕන” කියලා නියමයක් නෑ.

සමහර මව්වරුන්ට සති 6ක් ගිය පසුත් වේදනාවක් හෝ අසහනයක් තියෙන්න පුළුවන්
සමහරුන්ට ඊට පෙරම ශාරීරිකව සුවය ලැබිලා තියෙන්නත් පුළුවන්

ඒ නිසා ඔබේ ශරීරය ඔබට කියන දේ අහන්න. වේදනාවක්, බියක්, අසහනයක් තියෙනවා නම් තව කාලයක් බලා ඉඳීම වරදක් නෙවෙයි.

පළමු වාරයේදී වේදනාවක් දැනෙයිද?

දරුවා උපන් පසු පළමු වාර කිහිපයේදී ලිංගික සම්බන්ධතාවය ටිකක් අසහනකාරී ලෙස දැනෙන්න පුළුවන්. ඒ සඳහා හේතු කිහිපයක් තියෙනවා.

🔹 යෝනී මාර්ගයේ වියළි බව (Vaginal dryness)

කිරි දෙන මව්වරුන්ට ඊස්ට්‍රජන් (oestrogen) හෝර්මෝනය අඩුවීම නිසා, යෝනී මාර්ගයේ වියළි බව ඇතිවෙන්න පුළුවන්.

🔹 මැහුම් සහ තුවාල

සාමාන්‍ය දරු උපතකදී (Normal delivery) මැහුම් තිබුණොත්, ඒ ප්‍රදේශය සම්පූර්ණයෙන් සුවවෙන්න කාලයක් ගතවෙනවා. සිසේරියන් දරු උපතකදී ශල්‍ය කර්මය සිදු කළ ප්‍රදේශය අවට, විටෙන් විට සුලු කැක්කුම් ආදිය ඇති වෙන්න පුලුවන්.

👉 මෙවැනි අවස්ථාවල

ඉක්මන් නොවී සිටීම වැදගත් වෙනවා
වේදනාව දැනුණොත් මදක් නැවැත්වීමට ඔබත් සහකරුත් අතර අවබෝධයක් තිබීමත් වැදගත් වෙනවා
- වතුර ආශ්‍රිත ලිහිසි කාරකයක් (water-based lubricant) භාවිතා කිරීම වැදගත් වෙනවා.

දෙදෙනා අතර සමීපතාවය හෙමින් ගොඩනඟා ගැනීම ඉතා වැදගත්.

ලිංගික ආශාව අඩුවීම – “මට ලෙඩක් ද?”

දරුවා උපන් පසු ලිංගික ආශාව අඩුවීම බොහෝ මව්වරුන්ට ඇති වෙන සාමාන්‍ය දෙයක්.

හේතු:

නිදි නොලැබීම
දරුවා රැකබලා ගැනීමෙන් ඇතිවන තෙහෙට්ටුව
ශරීර හැඩය වෙනස් වීම ගැන ඇති අවිශ්වාසය
හෝර්මෝන වෙනස්කම්
“මවක්” ලෙස නව භූමිකාවට හැඩගැසීම

මෙය කාලීන අවස්ථාවක්. කාලයත් සමඟ, සහ ඔබට ලැබෙන සහයත් සමඟ, මේ හැඟීම් නැවත වෙනස් වෙනවා. කාලයට ඉඩදීමත් වැදගත්.

පියාගේ භූමිකාව මෙහි ඉතා වැදගත්

දරුවා උපන් පසු කාලය මවට විතරක් අභියෝගයක් නෙවෙයි. පියාටත් එය වෙනස්කම් ගෙන දෙන කාලයක්.

පියෙකු ලෙස,

ඉවසීම හා මව ට සෑම විට ම සහයෝගය ලබා දීම ඉතා වැදගත්.
ලිංගික හැසිරීම වලට බල කිරීමෙන් වළකින්න
මවගේ හැඟීම් අගය කරන්න
ලිංගිකත්වයට වඩා සම්බන්ධතාවය මුල්තැන කරගෙන කටයුතු කරන්න.

මෙය ඉදිරියේදී ලිංගික ජීවිතය තවත් ශක්තිමත් වීමට පදනමක් වෙනවා.

නැවත ගර්භණී වීම – කවදා සිදුවෙයිද?

දරුවා මව්කිරි පානය කරනවා වුවත්, ගර්භණී වීම සම්පූර්ණයෙන්ම නවතින්නේ නැහැ. ඒ නිසා දරුවා උපන් පසු, පවුල් සැලසුම් ක්‍රමයක් (family planning) සුදුසු උපත් පාලන ක්‍රම වෛද්‍ය උපදෙස් අනුව භාවිතා කිරීම ඉතා වැදගත්.

ලිංගිකත්වයට වඩා “සමීපතාවය” වැදගත් වන කාලයක්

දරුවා උපන් පසු කාලයෙදී ලිංගික සම්බන්ධතාවයට වඩා,

කතාබස් කිරීම
අතින් අල්ලා සිටීම
ආදරයෙන් බලන එක
එකිනෙකාගේ වෙහෙස තේරුම් ගැනීම

මේ දේවල් ඉතා වැදගත්. සමහර දවස්වල ලිංගික සම්බන්ධතාවයක් නොවුණත්, සම්බන්ධතාවය තවත් ගැඹුරු වෙන්න පුළුවන්.

වෛද්‍ය උපදෙස් ලබා ගන්න

පහත ලක්ෂණ තිබේ නම් වෛද්‍යවරයෙකු හමුවීම අත්‍යවශ්‍යයි.

තද උදරයේ හෝ යටි බඩෙහි වේදනාව
- යෝනී මාර්ගයෙන් දිගටම රුධිරය පිටවීම
  - යෝනී මාර්ගයෙන් දුර්ගන්ධයක් සහිත ශ්‍රාවයන් පිටවීම
දිගු කාලයක් මානසික අවපීඩනය සහ ලිංගික ආශාව සම්පූර්ණයෙන්ම නැති වීම

මෙය ලැජ්ජා විය යුතු දෙයක් නෙවෙයි. සෞඛ්‍යය කියන්නේ කතා කරලා විසඳා ගන්න ඕන, ප්‍රතිකාර ලබා ගන්න අවශ්‍ය දෙයක්.